Mongô a sup akum

        .

A nga bo na, mongô a nga to’é mfan, a mane ye’é mfan éyeyen. Nde a nga jô na,

“M’ake jeñe koé”.

A mane woé bibaé, ve ke afan.  Afan afan, afan afan, akekui afane zañe na, a koé na, beta môt a tele. Beta môte na,

“A mongô, jé ?”

Mongô na,

“M’azu mfan, m’ajeñe koé”.

Nye ve sili nye na,

“Ye mfan éyeyen ô ne wôé koé ? »

A nga to beta ébeme wôé, akum ve jaé été ne lut ! Nye mongô na,

« Ve to’é mfan wôé, ô nga ye’e ébem”.

Nye ve to’é ébaé jia, ve kut asila, nnôm avembe, not ! Ve ke mfan, ve ne kañ ! Avembe ve ngô’ô, ve si, kum ! Ve soo de, a bôé mongô si. Nye na,

« A mongô ».

Mongo na,

« Eññ”.

Nye na,

“Nyoñe’Koé nyô, ô nyoñ ôngôn a minlem mise. Ye w’ayem adi e ne ôwôndô ? »

Mongo na,

« Eññ”

Ke m’ate li’i nane a fumi’i”.

Nye na,

“M’ajô na, abime môte dame di, m’atetame di ôwôndô, amu bityila bise ya mu. Be tame mane yame beta nnam, ô zu me ve, me ve wo akum ese di. O za’a me ke’e ôwôndô, a mongô”.

Mongô na,

“Eññ”.

Nye na,

“A wô’a melo, a yen a mis, jé j’adañ ?”

Mongô na,

“A yen a mis”.

Nye na,

“Kele koé”.

Ane mongô a nga be’e koé, ve wulu afan afan, ve ke vam nlam. A suan nsezañ be ésa, miñyôn mi nga kutan,

“Ve koé-ô ! Ve koé-ô ! Za aka’a jame di ! Mone nyô a kôme wôé koé a mfan éyeyen”.

Ajô bôt b’azu yen, nde di. Ve nyoñe koé, be nga ba. A nyoñe minlem a bisek, a ôngôn, ve to’é, ve kee nyia. Nye nyia na,

Nyia ve yam, a bibôbolo bitan, ve fañe jôm.

Tyé é lendeya, a nyoñe bidi, ve lumbu afan, ve te ke mbañ ôwôndô wua. Nde a nga ke afan afan. A ngenan ôyap, a nga wô’ô zaé, a nga ye wu. Nye na,

“Me tame tyek”.

Ve kuli jôm. Nné ane a nga bibi tit anyu, a jô fe na, a wô’ô, te fe awô’ô, ve ne di di di, meñelé ! A bu’u bibôbolo bibaé, a diya bila. Afan afan, a nga ye wulu nté, ve suan ébem. Mvôé na,

« Ye mô a soya ? »

Mongô na,

« Me nyô ».

Nye na,

« Nnam ô né ?”

Mongô na,

« Etua jam m’ate yen. Bidi fo’o me nga naan, nane a maneya yam nnam, mone belo a to nda, nde éyoñ m’ate jô na, m’azu to’é bidi, a koé na, mone belo a maneya di”.

Nye na,

“Mimbañ mi ôwôndô mi né ?”

Mongô na,

« Eyoñ ôlun vi ate bi me nlem, étome ya nnam, me nji fe beta nambe mimbañ mi ôwôndô, nge simesan”.

Nye na,

“Ya, a se ke ajô”.

Ane a nga to’é mfan, a ébaé jia, ve kut asila, ébaé, ki ! Nnôm ésuma, vep ! Ve telé ébaé, ve ne sup ! Te jôm éfe, nnôm ésuma si, ki ! Ve to’é ésuma, ve bôé mongô si. Nye na,

« A mongô ».

Mongô na,

“M’ayebe”.

Nye na,

“M’asili wo na, ye wô’a melo, ye yen a mis, jé é ne mvaé ?”

Mongô na,

« A yen a mis »

Nye na,

« Ane w’aye beta kop, me tyite vé ? Tame yen akum. M’ajô na, va’a me ôwôndô. Nge ô ve me ôwôndô, me kee wo akume dina se. O lô mimbañ. Ane me nga bialé, me nji di ôwôndô, m’awô’ô nye ve minlañ. Nde m’ajô na, toké’é koé, ô ke ja, m’ayi nnam. M’ayi mimbañ mi ôwôndô mibien. Me tame tye’e di. Kele he”.

Ane mongô a nga to’é koé, ve be’e étu, ve suane ja. A ye tebetebe nseñ be ésa, beyale be ésa ve kutan ayenga,

“Ye mon a nga wôé koé angô’é a mfan éyeyen, ye a kôme beta soo koé fé ? »

Ve nyoñe koé, ve be nga vooé di, ve be nga ba. Esa a kape koé, minlem a ôngôn a mane vaa biôm bite, ve kee nye, nye ve kee nyia. Nye na,

“A na, yame’nnam”.

Nde nyia a nga mane yam nnam.

Tyé kpwa, nyia a nyoñ nnam, a wô’ô, ve kee nye bibôbolo bitan, nye na,

“Kele nga’aban, te kat éso-ô”.

A lumbu fé, afan afan, afan afan. Zaé é nga kui abum, nye na,

“Me tame tyek”.

Ve beta kuli jôme si. Ve ne di di di, meñ ! a bibôbolo bila. Ve bu’u bibôbolo bibaé. Te ke mbañ ôwôndô, mbañ !

Ve ke suan ébem, a ke koé na, mvôé é to. Nye na,

“A mô, ô soya”.

Mongô na,

“Eññ”.

Môte na,

“Owôndô a né, nnam ô né ?”

Mongô na,

« Mone belo tate a betaya mane di nnam ».

Nye na,

“Mimbañ mi ôwôndô mi né ?”

Mongô na,

« A mô-énan, ôlun ô wô’ô bi me nlem. Eyoñ nane a maneya yam nnam, mone belo ve mane di. Afôla me ne beta tyô’ô ôwôndô, te ke fe de”.

Môte na,

« Eññ, tabe’e si”.

Mongô ve tabe si. Ve to’é mfan, ve to’é ke ébaé. Ve kut asila, ngal avembe, nôôt ! Ve suu ébaé, kaé ! kuu !

Avembe e ngô’ô, ve ku si. Ve to’é, ve bôé si. Nye na,

« A mongô ».

Mongô na,

« Eññ”

Nye na,

“Ye wô’a melo, ye yen a mis, jé j’adañ ?”

Mongô na,

« A yen a mis ».

Nye mongô na,

« Va’a me ôwôndô, ô nyoñ akum ese di. Ve womien ô lô ! »

Ane mongô a nga té, a ke jal a koé ése. A ke kui jal ésa, miñyon ve beta jô. Ve nyoñe koé, ve be nga vooé, ve be nga ba. Ve nyoñe minlem a bisek a ôngôn, a to’é a kee nye. Nye nyia na,

“Yamek”.

Nyia a mane yam.

Tyé kpwa, nyia a beta wô’ô bibôbolo bitan, a nnam, ve to’é, a kee nye. Ve lumbu zene zen, afan afan, afan afan. Zaé ane a ye wu. Ve nyoñ nnam ve kuli si, ve ne di di di, meñ ! a bibôbolo bila. A ke koé môt, môte na,

« Fu’an, j’abôbo mekop mela ».

Ane a nga jô na,

« Me jaéya wo jibi. W’aye me beta yen ».

Fé, ne fubane, fubane, fubane, bia ! fute fut, bia !

Ane mongô a nga sup akum ana, a to te fek.